ALLT FYRIR ÁSTINA

Vonandi vakti fyrirsögnin athygli... en það er farið að kvarnast úr hópnum hjá þeim félögum.

Kærustuparið og nú hjónin Rince Lei Yu frá Kína og Kuan Sim Sze komu til að klífa Aconcagua sem hluta af brúðkaupsferð sinni.

Lei Yu er þrautreynd fjallakona sem m.a. hefur gengið á Elbrus, Kilimanjaro og fleiri viðlíka tinda. Hún náði sér í fjárfestingabankamanninn Kuan Sim frá Singapoore sem ekki hafði áður gengið á fjöll en verið liðtækur í ræktinni. En hvað gerir maður ekki fyrir ástina segir Guðmundur og Kuan Sim samþykkti að fara til Argentínu til að klífa Aconcagua í brúðkaupsferð. Parið gifti sig 5. janúar sl. og fljótlega eftir það var lagt af stað til S-Ameríku.

En strax þegar upp í grunnbúðir var komið var Kuan Sim algjörlega búinn á sál og líkama. Þegar þau settust niður í messatjaldinu sofnaði kappinn og var hreinlega illa haldinn. Talið var að hann væri með vatn í lungunum og var hann fluttur niður til Mendoza í þyrlu en eiginkonan fékk far með múlasna og þar með lauk þessari fjallgöngu hjá þeim.

Þá hætti Kóerumaðurinn Chung Kyung líka eftir gönguna upp í 1 búðir í gær. Hann er búinn að vera með stöðugan niðurgang og orðinn máttfarinn og fór af stað á múlasnanum niður til Mendoza fyrr í dag.