REYNT VIÐ TOPPINN

Ég heyrði í strákunum áðan þar sem þeir voru staddir í Kolera búðunum í tæplega 6000 m hæð. Þeir segjast nú ekkert vera neitt voðalega greindarlegir á svipinn en leið samt ágætlega þrátt fyrir höfuðverk og alltíðar kamarferðir. Guðmundur gekk með skíðagleraugun í dag og var miklu betri í augnun í dag heldur en þegar ég heyrði í honum í gær.

Ferðin frá Nido upp til Kolera búðanna gekk vel. Smávegis hálka en lítill snjór en það fór að snjóa þegar þeir voru að reisa tjöldin í búðunum. Þeir stoppa nú frekar stutt í þessum búðum enda verður ræs u.þ.b. klukkan 4.15 að staðartíma og brottför á tindinn kl. 06 (08 að íslenskum tíma).

Gengið verður á hraða snigilsins og áætlað að vera á toppnum klukkan 14 að staðartíma. Gangan fram og til baka er ca. 12-18 tímar eftir veðri og líkamlegu ástandi. 

Nú er það bara að muna að senda hlýjar kveðjur og hugsa til strákana í fyrramálið. Veðurspáin er hreint ágæt fyrir morgundaginn - sjá http://www.snow-forecast.com/resorts/Aconcagua/6day/top þarna sjáum við m.a. að spáð er uþb 30-35 km/klst vindi sem þýðir Kaldi á gamla vindstigaskala Veðurstofunnar. Það gæti hins vegar orðið svolítið kalt á strákana eða allt upp í 30 gráðu frost með vindkælingunni.